Yermak: Ukraina ka nevojë për disa qindra tanke

Ukraina ka deklaruar se i nevojiten disa qindra tanke kryesore luftarake për të ripushtuar territoret e pushtuara nga Rusia. “Çdo tank që është në gjendje të luftojë duhet të jetë sot në vijën tonë të frontit”, shkroi sot në Telegram shefi i zyrës presidenciale të Ukrainës, Andrii Yermak. “Pa një fitore të Ukrainës me një kthim në kufijtë e vitit 1991 dhe ndëshkimin e Rusisë, nuk do të ketë as zhvillim të qëndrueshëm dhe as një rend të qartë botëror”, tha ai. “Ky është fronti i qytetërimit kundër prapambetjes dhe barbarizmit”, tha Yermak. Ukraina është duke u mbrojtur nga pushtimi rus për gati 11 muaj. Kievi është pothuajse plotësisht i varur nga Perëndimi, si financiarisht ashtu edhe në aspektin e armatimeve. Së fundmi, Kievi mori tanke të modernizuara të dizajnuara nga sovjetikët nga Republika Çeke. Britania e Madhe, Polonia dhe Finlanda i ofruan Kievit perspektivën e tankeve perëndimore, duke përfshirë tanket “Leopard” të prodhimit gjerman. Kancelari gjerman, Olaf Scholz ka vonuar me javë të tëra vendimin për dorëzimin e tankeve të betejës “Leopard”. ATSH