Kompanitë e duhanit tani do të duhet të pastrojnë bishtat e cigareve nga rrugët dhe plazhet në Spanjë sipas një rregulloreje të re mjedisore. Vendimi, i cili gjithashtu thotë se prodhuesit e cigareve do të jenë përgjegjës për edukimin e publikut që të mos hedhin bishtat e cigareve në hapësirën publike, është pjesë e një pakete masash për të reduktuar mbetjet. Ende po përcaktohet se si do të zbatohen masat, sa do t’u kushtojnë kompanive të duhanit dhe nëse kostot do t’u kalojnë konsumatorëve. Ligji është në përputhje me direktivën e Marrëveshjes së Gjelbër të Bashkimit Evropian, e cila po ndërmerr hapa ligjorë për përdorimin e plastikës njëpërdorimshe, duke i detyruar ndotësit të kujdesen për atë që lënë pas. RTSH
Vendet që pinë më shumë duhan në BE janë Bullgaria, me 28,2 % të popullsisë që konsumon duhan çdo ditë, pastaj Turqia (27,3 %), Greqia (27,2 %), Hungaria (25,8 %) dhe Letonia (24,9 %). Vendet me më pak duhanpirës janë Suedia (9,3 %), Islanda (11,2 %), Finlanda (12,5 %), Norvegjia (12,9 %) dhe Luksemburgu (13,5 %). Suedia, vendi evropian me normat më të ulëta të pirjes së duhanit, ka luftuar me konsumin e cigares prej vitesh. Pirja e duhanit u ndalua në të gjitha baret dhe restorantet në fillim të vitit 2005. Në vitin 2019, ndalimi u zgjerua më tej duke përfshirë konsumin e cigares në natyrë në bare dhe restorante, si dhe në vende të tjera publike.
