45 milionë lekë shtesë për shpërblimin e sportistëve elitarë

Këshilli i Ministrave miratoi sot buxhet shtesë prej 45 milionë lekësh për Ministrinë e Arsimit dhe Sportit me qëllim shpërblimin e sportistëve elitarë. Ministrja e Arsimit dhe Sportit, Evis Kushi tha sot pas mbledhjes së qeverisë se “kërkuam një buxhet shtesë për MAS për shpërblimin e sportistëve elitarë”. “Siç jemi të gjithë dëshmitarë këtë vit sportistët elitarë kanë pasur rezultate të shkëlqyera në raport me vitet e tjera. Na kanë bërë krenarë me medalje ari, argjendi me rezultate shumë të mira në kampionate edhe botërore. Ne kemi kampionë botërorë”. Sipas Kushit, këto rezultate i kanë tejkaluar edhe parashikimet dhe planifikimet e MAS nga buxheti i kaluar. “Për të përmbushur detyrimin tonë ligjor për t’i shpërblyer sipas vendimit përkatës të Këshillit të Ministrave këta sportistë kishim nevojë për një shtesë fondi prej 45 milionë lekësh që u miratua. Në vendim janë të specifikuar edhe sportistët elitarë dhe trajnerët tyre”, tha Kushi.https://ata.gov.al/2022/12/19/miratohen-45-milione-leke-shtese-per-shperblimin-e-sportisteve-elitare/