Dita Ndërkombëtare e Maleve festohet çdo vit në 11 dhjetor për të krijuar ndërgjegjësim për rëndësinë e maleve për jetën, për të nxjerrë në pah mundësitë dhe kufizimet në zhvillimin e maleve dhe për të ndërtuar aleanca që do të sjellin ndryshime pozitive për popujt dhe mjediset malore në mbarë botën. Agjencia Kombëtare e Zonave të Mbrojtura, në një postim në rrjetet sociale thekson se ruajtja e maleve është faktor kyç për një zhvillim të qëndrueshëm. Malet janë strukturat më të bukura të natyrës, madhështore, të forta që qëndrojnë përballë qiellit dhe ndjejnë se mund të kapin të gjithë fshatrat në hijen e tyre. Ato janë burimet e rekreacionit dhe burimi i bujqësisë, ofrojnë hapësirë të bollshme në shpatet për prodhim. Malet luajnë një rol të rëndësishëm në ciklin e ujit. Turizmi malor tërheq rreth 15-20% të turizmit global. Kjo ditë u shpall nga Asambleja e Përgjithshme e OKB-së më 11 dhjetor të vitit 2003 dhe vuri në dukje nevojën e ndërgjegjësimit të vazhdueshëm mbi rëndësinë e maleve dhe zhvillimin e qëndrueshëm të mjedisit të tyre për të ruajtur cilësinë e jetës së njerëzve. Tema e Ditës së Maleve për vitin 2022 është “Gratë lëvizin malet”. Gratë luajnë një rol kyç në mbrojtjen e mjedisit dhe zhvillimin social e ekonomik në zonat malore. Ato janë shpesh menaxheret kryesore të burimeve malore, roje të biodiversitetit, si dhe të njohurive tradicionale, ruajtëse të kulturës lokale dhe eksperte në mjekësinë tradicionale. Dhjetë malet më të lartë në Shqipëri janë: Mali i Korabit, Shulani i Radomirës, Jezerca, Korabi i vogël, Maja Grykat e Hapëta, Kepi i Bardhë, Maja e Radohimës, Maja e Puplucës, Maja e Briskut, Maja e Hekurave.https://ata.gov.al/2022/12/11/11-dhjetori-dita-nderkombetare-e-maleve/
- Advertisment -