“Ivanovi” i Teatrit Kombëtar, çel festivalin e Shkupit

Festivali i Teatrit Shqiptar “Moisiu”, që po mbahet në Shkup, u çel me shfaqjen “Ivanov” të Çehovit, me regjinë e Hervin Çulit. Teatri Kombëtar i Shqipërisë ka çuar në Shkup, historinë e Nikollaj Ivanov, i cili po kalon një krizë të moshës së mesme. Ai nuk ka më ndjenja për gruan e tij Anën, e cila sakrifikoi gjithçka për të, është thellësisht në borxhe, rrezikon të humbasë pasurinë e tij, dhe ajo që është më shqetësuese, ai është në depresion të thellë. Në rolet kryesore janë aktorët Dritan Boriçi, Luli Bitri, Elia Zaharia, Alfred Trebicka, Neritan Liçaj, Flaura Kureta, Laert Vasili, Dori Çaushi, Gert Ferra, Anila Bisha, Gjergj Mena, Erin Kujofsa, Genti Deçka, Donald Shehu dhe Sofi Kotepano. Festivali i Teatrit Shqiptar “Moisiu”, është një ngjarje e rëndësishme, e bërë e mundur me bashkëfinancimin e institucioneve qendrore si Ministria e Kulturës së Shqipërisë, Ministria e Kulturës së Kosovës dhe Mistria e Kulturës së Maqedonisë së Veriut. Në këtë edicion, do të prezantohen 12 trupa teatrore, në 12 ditë shfaqje. Në fund, do të vlerësohen me çmimin “Moisiu”, më të mirët e festivalit.https://ata.gov.al/2022/11/17/ivanovi-i-teatrit-kombetar-cel-festivalin-e-shkupit/