G7: Do të ofrojmë ndihma të mëtejshme financiare për Ukrainën

Grupi i Shtatë (G7) që udhëheq fuqitë ekonomike demokratike synon të ofrojë ndihmë të mëtejshme financiare për Ukrainën në vitin e ardhshëm. ”Së bashku me komunitetin ndërkombëtar dhe në bashkëpunim të ngushtë me qeverinë ukrainase, G7 do të vazhdojë të punojë për të mbështetur Ukrainën në muajt dhe vitet në vijim”, thanë ministrat e financave të G7 pas takimit në margjinat e Fondit Monetar Ndërkombëtar. ”Nevojat më urgjente për financim të Ukrainës për vitin aktual mbulohen nga mbështetja ndërkombëtare. Por në vitin 2023 vendi përballet me një boshllëk të konsiderueshëm financimi për të siguruar shërbimet bazë dhe për të adresuar boshllëqet kritike të infrastrukturës”, thanë ministrat e financave. Përveç mbështetjes ushtarake dhe humanitare, tashmë janë dhënë ndihma buxhetore në vlerë prej 20.7 miliardë dollarë dhe janë zotuar gjithsej 33.3 miliardë dollarë për këtë vit.