NATO: Rrjedhja e gazit në Detin Baltik ishte sabotim

NATO deklaroi sot se do të hakmerrej për çdo sulm ndaj infrastrukturës kritike të 30 vendeve anëtare të saj, pasi nënvizoi se dëmtimi i dy tubacioneve të gazit jashtë Danimarkës dhe Suedisë, në ujërat ndërkombëtare në Detin Baltik, ishte sabotim. “Çdo sulm i qëllimshëm kundër infrastrukturës kritike të aleatëve do të përballet me një përgjigje të bashkuar dhe të vendosur”, thanë ambasadorët e NATO-s në një deklaratë. Ata deklaruan se dëmtimi i tubacioneve midis Rusisë dhe Gjermanisë “përbën një shqetësim të thellë”. Aleanca tha se “të gjitha informacionet e disponueshme tregojnë se ky është rezultat i veprimeve të qëllimshme, të pamatura dhe të papërgjegjshme të sabotimit. Këto rrjedhje po shkaktojnë rreziqe për transportin detar dhe dëme të konsiderueshme mjedisore.” Ministri danez i Mbrojtjes Morten Bodskov shkroi në Tëitter se ka një “dënim të përbashkët dhe një sinjal shumë të fortë nga aleanca”. Roja bregdetare suedeze konfirmoi të enjten një rrjedhje të katërt në tubacionet Nord Stream në jug të Suedisë. “Kemi rrjedhje në dy pozicione jashtë Suedisë”,- tha zëdhënësi i rojes bregdetare Mattias Lindholm. Ka edhe dy të tjera jashtë Danimarkës, tha ai. Dy nga rrjedhjet janë në tubacionin Nord Stream 1, i cili kohët e fundit ndaloi furnizimin me gaz, ndërsa dy të tjerat janë në Nord Stream 2, që nuk filloi kurrë të funksionojë. Megjithëse nuk funksiononin, të dy tubacionet ishin mbushur me gaz, i cili ka ikur dhe ka dalë me flluska në sipërfaqe. Tubacionet Nord Stream kalojnë nëpër Balltik për të transportuar gaz nga Rusia në Gjermani. Qeveritë daneze dhe suedeze besojnë se rrjedhjet nga vendet e tyre ishin “veprime të qëllimshme”. Para se të raportoheshin rrjedhjet, janë regjistruar shpërthime. Një shpërthim i parë u regjistrua nga sizmologët të hënën në juglindje të ishullit danez të Bornholm. Një shpërthim i dytë, më i fortë në verilindje të ishullit atë natë, ishte i barabartë me një tërmet me magnitudë 2.3 ballë. Stacionet sizmike në Danimarkë, Norvegji dhe Finlandë regjistruan shpërthimet. Disa zyrtarë evropianë dhe ekspertë të energjisë kanë thënë se Rusia ka të ngjarë të jetë pas çdo sabotimi, pasi ajo përfiton drejtpërdrejt nga çmimet më të larta të energjisë dhe ankthi ekonomik në të gjithë Evropën, edhe pse të tjerë paralajmëruan që të mos drejtohet gishti derisa hetuesit të jenë në gjendje të përcaktojnë se çfarë ka ndodhur. Në Moskë, zëdhënësi i Kremlinit Dmitry Peskov tha se incidenti i gazsjellësit Nord Stream do të ishte i pamundur, pa përfshirjen e një aktori shtetëror. “Duket si një sulm terrorist, ndoshta i kryer në nivel shtetëror,” tha Peskov në një konferencë me gazetarët. “Duke gjykuar nga sasia e shkatërrimit të Nord Stream, është e vështirë të imagjinohet se një veprim i tillë mund të ishte ndërmarrë pa përfshirjen e shtetit”, tha Peskov. “Është një situatë shumë e rrezikshme që kërkon një hetim të shpejtë.” Ai hodhi poshtë raportet e mediave për luftanije ruse të pikasura në zonë.https://lajme.rtsh.al/artikull/nato-rrjedhja-e-gazit-ne-detin-baltik-ishte-sabotim