Turqia është një partner i rëndësishëm i Shqipërisë në tregtinë ndërkombëtare. Instituti i Statistikave publikoi së fundmi raportin mbi tregtinë e jashtme për periudhën janar-korrik, sipas të cilit Turqia renditet partneri i dytë tregtar, duke zënë 8 % të vëllimit. Shkëmbimet tregtare me Turqinë në 7 muajt e këtij viti, kanë arritur 65.8 miliardë lekë. Referuar të dhënave për periudhën janar-korrik eksportet shqiptare drejt Turqisë u rritën me gati 100 milionë lekë, duke shkuar 3.7 miliardë lekë, nga 3.6 miliardë lekë që ishin 7-mujorin e 2021-shit, ndërsa importet për periudhën 7-mujore llogariten mbi 62.1 miliardë lekë. Nga Turqia, janë importuar 23.1 miliardë lekë materiale ndërtimi dhe metale, si dhe 10.5 miliardë lekë tekstile dhe këpucë. Ndërkohë importi i produkteve kimike dhe plastike llogaritet gati 7 miliardë lekë. Produktet më të eksportuara janë mineralet dhe metalet, bimët aromatike e mjekësore, dhe produktet fason. Shqipëria ka një marrëveshje të tregtisë së lirë me Turqinë, të nënshkruar në 2006-n, dhe e cila ka hyrë në fuqi në maj 2008. Nëpërmjet kësaj marrëveshje dy vendeve u krijohen mundësi për rritjen e shkëmbimeve tregtare ndërmjet tyre. Eksportuesit shqiptarë mund të përfitojnë nga marrëveshja e tregtisë së lirë mes Shqipërisë dhe Turqisë, e cila u jep atyre mundësinë e eksportit të një numri produktesh shqiptare në tregun rajonal pa tarifa doganore ose me kuota tarifore. Eksportet e produkteve industriale me origjinë shqiptare janë të liberalizuara. Ndërkohë, për produktet bujqësore palët i kanë akorduar reciprokisht njëra-tjetrës tarifa preferenciale dhe kuota tarifore.https://ata.gov.al/2022/08/24/shkembimet-tregtare-me-turqine-65-8-miliarde-leke/
- Advertisment -