Filmi i animuar “Zemërimi i shkronjave” është realizuar me skenar të të mirënjohurit Luan Rama, regjia nga Boris Ikonomi, operator Tomi Vaso si dhe mban muzikën e kompozitorit Agim Krajka. Filmi është vepër e vitit 1981.
Shkronjat zemërohen me Artanin sepse ai dëmton vazhdimisht librat e shkollës. Për këtë arsye, shkronjat largohen nga librat e tij për në qytetin e tyre. Artani i ndjek, bie rob dhe i bëhet gjyqi nga shkronjat. Dënimi i tij është të lexojë me shkronja të shkarravitura, gjë që e bën të kuptojë rëndësinë e ruajtjes së librave dhe gjuhës
Albana Nexhipi, si shkrimtare dhe përkthyese e librave për fëmijë, thotë se vendosi të ndihmonte në restaurimin e këtij filmi sepse i do shumë fjalët dhe se beson tek fuqia e tyre.
“Ndryshe nga shumë të tjerë, që ndonjëherë i shohin germat edhe si të panevojshme, unë besoj me shpirt se rëndësia e tyre është thelbësore në ruajtjen e gjuhës tonë të vyer. Dëshira ime është që brezi i ri, ngecur tashmë në rrjetën e internetit, ta kuptoje këtë gjë dhe t’i ruajë ato dhe fjalën shqipe si sytë e ballit”, shprehet Nexhipi, me shpresën se fëmijët do ta kuptojnë rëndësinë e shkronjave në ruajtjen e gjuhës sonë.
