Shqipëria ka mbyllur 77,5% të hendekut gjinor dhe në vitin 2026 renditet në vendin e 25-të në botë, nga vendi i 36-të një vit më parë.
Shqipëria ka rezultatin më të lartë ndër ekonomitë e rajonit të Ballkanit Perëndimor, të përfshira në indeks.
Serbia renditet e 39-ta me rezultat 0,754, Bosnjë-Hercegovina e 62-ta me 0,723, Mali i Zi i 74-ti me 0,715 dhe Maqedonia e Veriut e 82-ta me 0,709.
Pozicioni në renditje është rritur me 11 vende.
Raporti e veçon Shqipërinë specifikisht në analizën e tij kryesore, duke e renditur në grupin e pesë vendeve që kanë shënuar progresin më të lartë këtë vit (së bashku me Etiopinë, Spanjën, Malin dhe Meksikën).
Pikat kyçe të përmbledhjes për Shqipërinë përfshijnë fuqizimin politik të grave si pika më e fortë.
Përmirësimi i madh i Shqipërisë në indeks i atribuohet kryesisht rritjes së prezencës së grave në institucionet politike.
Shqipëria vlerësohet lart për përfaqësimin e grave në poste ministrore dhe në parlament duke u renditur ndër pozicionet udhëheqëse në rajon dhe më gjerë.
Rritja e rolit të grave në politikë ka dhënë një efekt pozitiv zinxhir, duke sjellë një numër më të lartë të grave në role të larta drejtuese (senior roles) në tregun e punës në Shqipëri.
Megjithatë, ashtu si në shumë vende të tjera, pjesëmarrja e përgjithshme e grave në forcën e punës mbetet një zonë që kërkon vëmendje të vazhdueshme për të shmangur stagnimin.
Një nga rezultatet më të larta të Shqipërisë është në pjesëmarrjen dhe mundësitë ekonomike, ku vendi ka mbyllur 79,9% të hendekut dhe renditet e 12-ta në botë.
Shqipëria renditet e para në botë për barazinë e pagave për punë të ngjashme dhe për përfaqësimin e grave në profesionet profesionale dhe teknike.
Të dhënat e tjera të INSTAT tregojnë se gjatë viteve të fundit gratë në pozicionet drejtuese janë paguar më shumë sesa meshkujt.
Në vitin 2025 gratë paguheshin 232 mijë lekë kundrejt 214 mijë lekëve për burrat, pra rreth 8% më shumë.
Për nëpunësit e lartë të administratës shtetërore dhe drejtorë ekzekutivë gratë u paguan 126 mijë lekë në 2025-n ose 9% më shumë se burrat.
Sipas raportit të WEF, në arsim, hendeku është mbyllur në 96,2%, ndërsa në shëndetësi dhe mbijetesë në 96,5%.
