Në botë ka ende tre miliardë njerëz pa internet

Banorët e planetit që nuk janë lidhur kurrë në internet janë pothuajse tre miliardë, rreth 37% e popullsisë së botës, sipas një raporti të Organizatës së Kombeve të Bashkuara që studiuan përhapjen digjitale në mbarë botën, shkruan faqja italiane e dedikuar teknologjisë focus.com. Sipas studimit, 96% e njerëzve që nuk kanë akses në internet jetojnë në vendet në zhvillim. Edhe pse këto shifra duken mbresëlënëse, duhet theksuar se midis 2019 dhe 2021 rreth 800 milionë njerëz u lidhën për herë të parë në internet: një rritje që bëri që përdoruesit e internetit të arrijnë në 4,9 miliardë dhe që u mbështet veçanërisht nga pandemia. Sipas Kombeve të Bashkuara, në fakt ishte Covid-19 ai që favorizoi përdorimin e internetit, qoftë edhe me lidhje me cilësi të ulët. Kjo është një rritje prej 10% krahasuar me vitin e kaluar, rritja më e lartë vjetore e parë ndonjëherë që kur ka ekzistuar interneti. Bllokimet, shkolla dhe puna në distancë, nevoja për të komunikuar pa dalë nga shtëpia ishin faktorët nxitës të këtij fenomeni.