Një teknikë inovative për trajtimin e kancerit të gjirit, e cila përdor ngrirjen e tumorit me azot të lëngshëm, ka treguar 100% efektivitet në testet fillestare.
Studimi i kryer nga shkencëtarët brazilianë në “Universitetin Federal të San Paulos” (Unifesp) jep shpresë për një mënyrë më të thjeshtë dhe më pak invazive të trajtimit të sëmundjes.
Çfarë është krioablacioni?
Krioablacioni është një teknikë që përdoret tashmë në vende si SHBA-ja dhe Japonia.
Ajo konsiston në aplikimin e azotit të lëngshëm direkt mbi tumor, duke arritur temperatura rreth -140°C.
Kjo krijon një “sferë akulli” që shkatërron qelizat kancerogjene.
Përparësitë kryesore të procedurës:
Teknikë minimale invazive
Pa dhimbje dhe shumë e saktë
Kryhet me anestezi lokale
Nuk kërkon shtrim në spital
Prerje më e vogël se biopsia tradicionale
Studimi i parë i kryer në Amerikën Latine
Kërkimi u zhvillua në Spitalin e San Paulos dhe është studimi i parë i këtij lloji në një institucion publik në Amerikën Latine.
Studiuesit theksojnë se analiza të tilla janë thelbësore për të konfirmuar efektivitetin dhe për të zgjeruar përdorimin e krioablacionit si në sistemin publik shëndetësor, ashtu edhe në klinikat private.
Për cilët pacientë rekomandohet?
Procedura rekomandohet për pacientët me tumore deri në 2,5 centimetra, të cilët në fazën fillestare kanë indikacion për ndërhyrje kirurgjikale.
Aktualisht, trajtimi në Brazil, nuk mbulohet ende nga sigurimet shëndetësore në vend.
Megjithatë, miratimi nga Agjencia Kombëtare e Mbikëqyrjes Shëndetësore (Anvisa) dhe studimet në vazhdim mund të përshpejtojnë përfshirjen e tij në sistemin shëndetësor.
