Revista prestigjioze britanike Condé Nast Traveller Magazine e përshkruan Shqipërinë si një vend “par excellence” të turizmit kulinar falë resurseve që i ka falur natyra, traditës së mbajtur gjallë ndër breza dhe punës së palodhur të shefave të kuzhinës që e kanë risjellë kuzhinën e traditës në versionin më të mirë të saj. Kryeministri Edi Rama ndau sot shkrimin e Condé Nast Traveller Magazine ku thekson se, Shqipëria vjen si një destinacion fantastik i kuzhinës në revistën prestigjioze. “Përshkruar përmes bujarisë së njerëzve, shijes së verërave dhe aromës së erëzave të shumëllojshme, në 10 faqet e këtij artikulli, Shqipëria prezantohet si një destinacion “me detyrim përcaktim” i turizmit kulinar, për të përjetuar shijen, transformimin dhe identitetin e veçantë, që shefat shqiptarë të kthyer nga emigracioni apo të rritur prej amvisash shembullore, i kanë dhënë gastronomisë europiane”, shkruan Rama në postimin e tij në rrjetet sociale. Pas dy sezonesh verore të ndikuara nga pandemia, turizmi i është rikthyer normalitetit dhe këtë e tregojnë të dhënat pozitive të periudhës janar-qershor 2022, krahasuar me të njëjtën periudhë të vitit 2019. Edhe sipas të dhënave të INSTAT, Shqipëria pritet që të ketë këtë vit sezonin më të mirë turistik sa i përket turistëve të huaj, duke tejkaluar dhe vitin 2019 para pandemisë, që deri tani mbante rekordin. Vetëm gjatë muajit qershor në vend kanë hyrë 876 mijë shtetas të huaj, me një rritje prej gati 40% në krahasim me muajin qershor të vitit 2019.https://ata.gov.al/2022/07/30/prestigjiozja-conde-nast-traveller-magazine-shqiperia-destinacion-fantastik-kulinar/
- Advertisment -