Libri u botua pas mbrojtjes së tezës së doktoraturës mbi Bylisin dhe Koinonin e Bylinëve nga Olgita Ceka, e cila mori vlerësimin maksimal (“magna cum laude”) nga juria e Universitetit të Darmstadt në Gjermani.
Libri “Byllis territorial, political and architectural organisation” u paraqit nga arkeologu prof. dr. Skënder Muçaj.
Autorja dr. O. Ceka ndjek zhvillimin e procesit të urbanizimit në Ilirinë e Jugut, duke pasur si model kryesor qytetin antik të Bylisit. Ajo trajton zhvillimin e qyteteve dhe koinonin, duke u mbështetur në hulumtimet e dekadave të fundit në këtë fushë, veçanërisht nga studiuesit shqiptarë të Antikitetit të Hershëm, që synonin të nxirrnin në pah një faqe të re kulturore të lidhur me popullsinë e lashtë të Shqipërisë.
Këto hulumtime ofruan njohuri krejtësisht të reja mbi format monumentale të qendrave urbane të lashta jogreke të Shqipërisë dhe hapën rrugën për studime të mëtejshme më të thella dhe paralele të fenomenit të urbanizimit në Ilirinë e Jugut. Përveç qëllimit për të krijuar qendra të reja arkeologjike vizitore nëpërmjet gërmimeve në komplekse monumentale, si Bylisi, Antigonea ose Fenika, ka pasur edhe kërkime të orientuara drejt programit që synojnë sqarimin e problemeve të poleogjenezës.
