Federata Shqiptare e Futbollit në kuadër të punës kërkimore për afrimin e talenteve të reja për t’i afruar në Kombëtaren e Shqipërisë do të zhvillojë në muajin dhjetor aktivitetin “Open Stage”.
Në aktivitet do të marrin pjesë futbollistët e rinj me origjinë shqiptare që jetojnë në Europë, Shtetet e Bashkuara të Amerikës dhe kudo në botë. Gjatë ditëve të aktivitetin futbollistët do mund të shpalosin aftësitë e tyre sportive, të cilat do të vlerësohen nga një grup profesionistësh të FSHF.
Ky aktivitet, njofton FSHF, do të shërbejë për vlerësimin e lojtarëve të rinj shqiptarë të moshave 2009–2012, të lindur dhe rritur në shtete të ndryshme të Europës dhe botës, dhe organizohet nga Drejtoria Teknike dhe Departamenti i Skautimit në FSHF.
Seancat do të mbahen në Shtëpinë e Futbollit në Tiranë, sipas këtij kalendari:
- 08 dhjetor 2025 – datëlindja 2011, ora 09:00
- 09 dhjetor 2025 – datëlindja 2009, ora 09:00
- 10 dhjetor 2025 – datëlindja 2010, ora 09:00
- 16 dhjetor 2025 – datëlindja 2012, ora 09:00
Lojtarët duhet të paraqiten në datën përkatëse të pajisur me certifikatë mjekësore dhe leje nga klubi për pjesëmarrje.
Aplikimet për t’u bërë pjesë e seleksionimeve kanë nisur dhe çdo lojtar që dëshiron të marrë pjesë në këtë eksperiencë mund të plotësojë formularin e vendosur në dispozicion nga FSHF brenda datës 5 dhjetor 2025 dhe ta dërgojë në adresën e e-mail-it: [email protected] .
Organizimi i “Open Stage” çdo dhjetor nga Federata e Futbollit është kthyer në një traditë të bukur. Ky aktivitet vjen si rrjedhojë e kërkesave të komunitetit shqiptar në mbarë botën, por edhe për t’u dhënë mundësi të gjithë lojtarëve shqiptarë të tregojnë vlerat e tyre me fanellën kuqezi, me synim identifikimin e talenteve të reja për ekipet kombëtare të moshave.
