Gjatë raportimit vjetor në Komisioni për Ekonominë, Punësimin dhe Financat, Kaçi theksoi se procesi i hartimit të ligjit ka avancuar ndjeshëm dhe tashmë është përgatitur një draft i parë, i cili është hedhur për konsultim me grupet e interesit.
“Kemi punuar për draftimin e ligjit dhe është përgatitur një version i parë. Ai është dërguar për konsultim me grupet e interesit. Parashikojmë që drafti i plotë të finalizohet brenda këtij viti”, tha Kaçi.
Kaçi informoi se gjatë vitit 2024 është kryer një vlerësim krahasues i kuadrit ligjor vendas me atë të Bashkimit Evropian, ku rregullorja e re për kriptovalutat ka hyrë në fuqi plotësisht këtë vit.
“Procesi edhe në vendet e BE-së nisi me një implementim gradual, ndërsa prej këtij viti po zbatohet në mënyrë të plotë”, shtoi ajo.
Sipas saj, pjesë e punës për hartimin e ligjit janë edhe Banka e Shqipërisë, Ministria e Financave dhe ajo e Ekonomisë dhe Inovacionit, me qëllim ndërtimin e një baze ligjore që garanton transparencë, siguri dhe mbrojtje të investitorëve në tregun e kriptovalutave.
Ekspertët në treg përllogarisin se numri i shqiptarëve që kanë portofol digjital llogaritet mbi 80 mijë.
Pak ditë më parë kreu i SPAK raportoi se në 2024 janë sekuestruar kriptovaluta me një vlerë prej 11 milionë euro.
