Ekzistojnë shumë pak vende sekrete dhe pothuajse të pacënuara në Evropë që ende ofrojnë peizazhe marramendëse me çmime të përballueshme, shkruan Rosanna Carrizzo në një artikull të botuar në të përditshmen italiane “Wom Travel”.
Jeni duke kërkuar një destinacion autentik pushimesh? Ne ju sugjerojmë një vend magjepsës: Shqipërinë. Por cilat plazhe në Shqipëri duhet të vizitoni?
Plazhet dhe deti në Shqipëri
Bregdeti shqiptar, i quajtur shpesh “Karaibet e Evropës”, është destinacioni i ardhshëm i shkëlqyer veror.
Ju mund të shijoni plazhet spektakolare, të pastra dhe detin bruz, në një atmosferë autentike dhe me çmime të përballueshme.
Mikpritja është e ngrohtë, kuzhina e shijshme dhe ndërthurja e historisë së lashtë dhe bukurisë natyrore e bën këtë vend një destinacion magjepsës.
Shqipëria është një perlë mesdhetare, me një vijë bregdetare prej 363 kilometrash – e lagur nga detet Adriatik dhe Jon – me peizazhe marramendëse të Rivierës.
Deti Adriatik kundrejt detit Jon: Cilin duhet të zgjidhni?
Zgjedhja e bregdetit varet nga lloji i pushimeve që po kërkoni.
Deti Adriatik, i cili shtrihet nga kufiri me Malin e Zi deri në Vlorë, karakterizohet nga plazhe të gjata me rërë të artë dhe ujëra të cekëta, ideale për familjet me fëmijë.
Vende si Durrësi, Golemi dhe Velipoja janë të njohura për lagunat dhe rezervatet natyrore.
Sapo të keni kaluar Qafën e Llogorasë, do të shfaqet peizazhi spektakolar i Rivierës Shqiptare në detin Jon.
Kjo zonë, e cila shtrihet nga Vlora deri në kufirin me Greqinë, ofron një sërë gjiresh të izoluara, shkëmbinj të pjerrët, plazhe me guralecë të bardhë dhe ujëra verbuese bruz.
Këtu do të gjeni detin më të bukur, perfekt për zhytje me maskë dhe për ata që kërkojnë peizazhe perfekte si në kartolina.
Destinacionet që duhet të vizitohen përfshijnë, Dhërmiun, Himarën, Borshin, Sarandën dhe Ksamilin.
