Spanja nuk duhet të marrë pjesë në edicionin e ardhshëm të festivalit të këngës në Eurovision nëse Izraeli merr pjesë, një bojkot që tashmë është mbështetur nga vendet e tjera.
“Ne duhet të sigurohemi që Izraeli të mos marrë pjesë në edicionin e ardhshëm të Eurovisionit dhe nëse nuk arrijmë ta bëjmë këtë, Spanja nuk duhet të marrë pjesë”, tha Ernest Urtasun gjatë një interviste në radion publike.
Ai përsëriti se “Irlanda, Sllovenia, Islanda dhe Holanda e kanë marrë tashmë këtë qëndrim”.
”Vendimi do të mbetet te organizatori i Eurovisionit, Bashkimi Evropian i Transmetimeve (EBU)”, theksoi ai.
Në Asamblenë e Përgjithshme të EBU-së në korrik, disa vende kishin shprehur shqetësime në lidhje me pjesëmarrjen e Izraelit në edicionin e vitit 2026 të konkursit, i cili është planifikuar të mbahet në Vjenë, dhe EBU i lejoi ato të tërhiqeshin nga konkursi deri në mesin e dhjetorit, pa penalitete financiare.
Në maj, kryeministri socialist, Pedro Sanchez deklaroi se Izraeli duhet të përjashtohet nga Eurovision, shfaqja më e madhe e talenteve në botë, nga “solidariteti” me “popullin e Palestinës që po përjeton absurditetin e luftës dhe bombardimeve”.
Spanja, e cila njohu shtetin e Palestinës më 28 maj 2024, së bashku me Irlandën dhe Norvegjinë, është shfaqur në muajt e fundit si një nga zërat më kritikë të BE-së ndaj qeverisë së Benjamin Netanyahut dhe historikisht ka mbështetur kauzën palestineze.
