Ministrja e Infrastrukturës dhe Energjisë, Belinda Balluku deklaroi sot se Rruga e Arbrit është e hapur pjesërisht dhe se afati për përfundimin e plotë të saj u shty, për shkak të formacioneve gjeologjike, në tunelin e Murrizit. “Edhe pse e hapur pjesërisht, ka pasur një impakt shumë të madh, për shkak të shkurtimit të minutave që duhen për tu lidhur me Tiranën. Problematika ka ardhur nga formacionet gjeologjike që kemi hasur në Tunelin e Murrizit. Afati i kontratës për dorëzim ka qenë fundi i muajit prill të këtij viti, por pikërisht për shkak të formacioneve gjeologjike, dhe burimeve të shumta nënujore që ka zona, afati u shty me 17 muaj”, deklaroi Balluku. Ndërkohë, ministrja informoi se për të anashkaluar këtë formacion gjeologjik, ka pasur ndërhyrje edhe në projekt, duke e zgjatur atë me 0.6 km dhe duke e çuar në 3.8 km, nga 3.2 km që ishte parashikuar në fillim. Ministrja tha se siguria do të jetë e garantuar. Duke folur rreth qëndrimeve politike të mbajtura rreth kësaj vepre, ministrja Balluku bëri të ditur se nuk ka pasur asnjë shtesë fondi për kontratës. “Ky është një projekt i kyçur, në një kontratë me çelësa në dorë. Nuk ka shtesë fondesh. Është detyrim i koncesionarit që në këto 13 vite të qëndrojë në të njëjtat fonde financiare që janë vendosur, që prej fillimit”, deklaroi Balluku. Ajo informoi se, po vijon paralelisht puna edhe për ndërtimin e tunelit të emergjencës dhe se deri tani kanë përfunduar 3600 m. Mbeten për tu përfunduar edhe 200 m.http://ata.gov.al/2022/07/22/balluku-rruga-e-arbrit-gati-brenda-17-muajsh/
- Advertisment -