Shtetet e Bashkuara të Amerikës planifikojnë të zhvendosin forcat e tyre nga aeroporti ushtarak polak në Rzeszow në baza të tjera në Poloni, si pjesë e një përpjekjeje më të gjerë për të përmirësuar operacionet ushtarake.
Ushtria amerikane për Evropën dhe Afrikën njoftoi se po lëvizte trupat nga selia e saj në Gjermani, duke shtuar se ”vendimi ishte i koordinuar me Poloninë dhe aleatët e tjerë të NATO-s”.
Gjenerali i komanduar, Christopher Donahue e përshkroi masën si një masë të kursimit të kostos, duke thënë se ajo përfaqëson një mundësi për të “kursyer taksapaguesit amerikanë dhjetëra miliona dollarë në vit”.
I vendosur në Poloninë juglindore, aeroporti në Rzeszow ka qenë një qendër kryesore logjistike për ndihmën ushtarake perëndimore për Ukrainën që nga fillimi i pushtimit në shkallë të plotë të Rusisë në vitin 2022.
Trupat amerikane janë vendosur atje për të mbrojtur objektin, duke përfshirë sistemet e mbrojtjes ajrore ”Patriot”.
Shtetet e Bashkuara thanë se fluksi i ndihmës ushtarake për Ukrainën përmes Rzeszow do të vazhdonte pa ndërprerje, por Polonia dhe aleatët e tjerë të NATO-s tani do të marrin përgjegjësinë për sigurinë e vendit.
Rivendosja e planifikuar vjen në sfondin e shqetësimeve më të gjera në Evropë për angazhimin e Shteteve të Bashkuara ndaj NATO-s, veçanërisht në dritën e thirrjeve të përsëritura të presidentit Donald Trump për rritjen e shpenzimeve të mbrojtjes nga anëtarët e aleancës.
