Trajnimi u realizua nga specialistë të 9 vendeve, përfshirë edhe Shqipërinë, të cilat janë trajnuar nga ekspertë të BE-së. Pamje nga trajnimi u publikuan në rrjetet sociale nga Qendra Kombëtare e Urgjencës Mjekësore.
Trajnimi konsistonte në improvizimin e një incidenti kimik brenda një magazine, për të demonstruar më pas teknikat e ndërhyrjes dhe reagimit për të qenë sa më efikas.
“Ne kemi bashkuar 9 vende për të parë se sa efektiv ka qenë trajnimi, dhe të gjitha vendet, përfshirë edhe Shqipërinë, tashmë kanë aftësinë për t’u përgjigjur ngjarjeve me natyrë kimike, biologjike apo radioaktive”, thotë Mark Salter, ekspert i Qendrës së Ekselencës në BE.
Përveç trajnimit të profesionistëve që reagojnë në ngjarje të tilla, Urgjenca Kombëtare është pajisur me të gjitha mjetet për të reaguar në çdo situatë.
“Si tenda që shikoni pas meje, ka 3 të tilla, të cilat përdoren si vend ngjarje dhe para spitaleve, në mënyrë që të mos kontaminohen strukturat publike”, thotë Skënder Brataj, drejtor i Urgjencës Kombëtare.
Edhe pse janë ngjarje që nuk i shohim rëndom, Brataj thotë se të tilla trajnime janë të domosdoshme.
