Paraatleti Grevisti Bytyqi garoi në Lojërat Paralimpike, “Paris 2024”, duke shkruar kështu kapitullin e parë dhe më të rëndësishëm të historisë së Kosovës në Lojëra Paralimpike – paraqitjen e parë shtetërore ndërkombëtare.
Vetëm 200 metra pas fillimit të vrapit 1500-metërsh, në sportin e atletikës, në të cilin garoi Bytyqi, ndodhi një incident që ndikoi që paraatleti kosovar të humbiste ritmin e garës duke u goditur në këmbë nga një atlet tjetër. Si rrjedhojë e kësaj, atleti që shkaktoi incidentin u skualifikua.
Por, përkundër kësaj, Grevisti realizoi një paraqitje dinjitoze, e cila na bën krenarë.
Emocionet ishin të jashtëzakonshme teksa Grevisti u bë kosovari i parë që shkel stadiumin “Stade de France”, si një paraatlet, i barabartë me të tjerët nga e gjithë bota.
Realizimi i këtij rrugëtimi madhor për parasportin kosovar do të ishte i pamundur pa lidershipin e presidentes së Komitetit Paralimpik të Kosovës, Njomza Emini.
“Grevisti tregoi maturi dhe profesionalizëm. Ky është vetëm fillimi për të dhe për shumë parasportistë të tjerë. Ne, si Komitet, jemi shumë krenarë për paraqitjen e Grevistit dhe të delegacionit tonë, si dhe kontributin e dhënë për parasportistët dhe shtetin tonë në Paris”, citohet Emini në komunikatë.
Komiteti Paralimpik i Kosovës i është mirënjohës të gjithë atyre që i kontribuuan paraqitjes së parë të Kosovës në Lojërat Paralimpike “Paris 2024”, si dhe që mbështesin parasportin kosovar.
