UNESCO, organizata kulturore e Kombeve të Bashkuara, ka paralajmëruar kundër mohimit të Holokaustit dhe falsifikimit të historisë të krijuar nga inteligjenca artificiale (IA). Në një raport të publikuar së bashku me ”Kongresin Botëror Hebre”, UNESCO thotë se ”rrëfimi historik i Holokaustit mund të shtrembërohet dhe të nxisë antisemitizmin nëse parimet etike për përdorimin e inteligjencës artificiale nuk do të zbatoheshin ndërkombëtarisht”. IA gjeneruese, si ajo e përdorur nga chatbot ChatGPT, mbështetet në të dhënat nga interneti, të cilat përmbajnë gjithashtu përmbajtje mashtruese dhe paragjykime njerëzore. Kjo mund të keqinterpretojë informacionin rreth ngjarjeve të caktuara dhe të përforcojë paragjykimet, thuhet në raport. Për shkak të mungesës së monitorimit dhe moderimit nga zhvilluesit e AI, mjetet gjeneruese të IA mund të trajnohen gjithashtu mbi të dhënat nga faqet e internetit që mohojnë Holokaustin. Për më tepër, IA lejon aktorët keqdashës të falsifikojnë përmbajtje të tilla si dëshmitë e Holokaustit dhe dokumentet historike. Imazhet e rreme dhe përmbajtja audio e krijuar me IA gjeneruese janë veçanërisht bindëse për të rinjtë që mund t’i hasin në platformat e mediave sociale.
