64 vende nënshkruajnë një pakt kundër urisë

Parlamentarët nga 64 vende të OKB nënshkruan dje në Valparaiso të Kilit, një pakt global për të luftuar urinë, një e keqe që prek 828 milionë njerëz në botë. Ky samit i dytë parlamentar botëror kundër urisë dhe kequshqyerjes, me iniciativën e Organizatës së Kombeve të Bashkuara për Ushqimin dhe Bujqësinë (FAO), mblodhi për dy ditë në parlamentin kilian 150 zyrtarë të zgjedhur, përveç dhjetëra të tjerëve të pranishëm online. Në fund të këtij takimi, pjesëmarrësit nënshkruan një pakt global, objektivi i të cilit është të inkurajojë shtetet anëtare, veçanërisht organet e tyre legjislative, për të luftuar kundër urisë dhe kequshqyerjes. Për shembull, ai parashikon konsolidimin e aleancave parlamentare ndërkombëtare dhe krijimin e aleancave të reja, për të nxitur shkëmbimin e përvojave, praktikat e mira dhe zhvillimin e zgjidhjeve. “Ka të bëjë me hyrjen në një fazë të re të ndërveprimit midis parlamenteve. Parlamentet duhet të marrin gjithnjë e më shumë përgjegjësi”, tha zëvendësdrejtori i FAO Mario Lubetkin. Sipas OKB-së, 828 milionë njerëz vuajtën nga uria në vitin 2021 në mbarë botën, 46 milionë më shumë se në vitin 2020 dhe 150 më shumë se në vitin 2019. Një situatë e rënduar ndër të tjera nga konfliktet, ndryshimet klimatike dhe pandemia Covid-19. “Çdo ditë në botë, 8 500 fëmijë vdesin nga kequshqyerja”, tha deputetja kiliane Carolina Marzan, e cila kryeson Frontin Parlamentar Kundër Urisë në Kili. Gratë janë më të rrezikuara se burrat, sipas FAO. Një samit i tretë do të organizohet në Afrikë në vitin 2026 për të vlerësuar efektet e marrëveshjeve të bëra në Kili.