Një grua e pasur në Kinë ka vendosur të lërë pasurinë e saj me vlerë 2,8 milionë dollarë për kafshët e saj shtëpiake, duke thënë se tre fëmijët e saj nuk do të marrin asgjë. “Gruaja nga Shangai vendosi mos t’i përfshinte fëmijët e saj në testament, pasi ata e kishin lënë pas dore në pleqëri dhe nuk e vizitonin kur ajo ishte e sëmurë”, sipas “South China Morning Post”. Vendimi i saj dramatik u përshëndet pozitivisht nga disa qytetarë kinezë në internet. “Bravo. Nëse vajza ime më trajton keq në të ardhmen, unë do t’ua lë shtëpinë time të tjerëve,” tha njëri prej tyre. Sipas testamentit të saj, paratë duhet të shpenzohen për kafshët shtëpiake dhe pasardhësit e tyre pasi të vdesë. Meqenëse në Kinë nuk është e ligjshme t’u lihen paratë drejtpërdrejt kafshëve, një klinikë veterinare lokale do të jetë përgjegjëse për kafshët shtëpiake dhe do të jetë administratori i trashëgimisë.
