1.5 mln lekë fermerëve për fara/fidanë dhe inpute bujqësore

Skema Kombëtare e Mbështetjes së Bujqësisë 2023 ofron pagesa direkte për fermerët për fara/fidanë dhe inpute bujqësore, me qëllim uljen e kostove të prodhimit. Ministrja e Bujqësisë dhe Zhvillimit Rural, Frida Krifca informoi se, falë Skemës Kombëtare të Mbështetjes në Bujqësi për këtë masë, fermerët ose grupfermerësh mund të përfitojnë deri 1.5 milionë lekë mbështetje financiare. “Masa 4 është mbështetje për fara/fidanë dhe inpute të tjera me vlerë deri në 200 000 lekë për ha për sezon dhe jo për më shumë se 2 sezone për kultivimin e perimeve, rrushit në tavolinë për serra dhe/ose luleshtrydhe në tunele plastike për fermerë individualë dhe grup fermerësh me sipërfaqe të mbjellë jo më pak se 1 ha dhe jo më shumë se 1 500 000 lekë për aplikant”, tha Krifca. Ministrja i bën thirrje fermerëve të aplikojnë përmes e-Albania, teksa thirrja është e hapur prej datës 20 mars deri në 11 prill. Fondi total për subvencionimin e bujqësisë është 3.3 miliardë lekë, i ndarë në disa sektorë prioritarë, që prek çdo hallkë të zinxhirit të prodhimit nga ferma, në tryezat tona dhe në eksporte. Pjesë e Skemës Kombëtare të Mbështetjes në Bujqësisë është edhe masa e naftës falas për fermerët, për të cilën janë akorduar 1.4 miliardë lekë dhe që funksionon me të njëjtën procedurë aplikimi për t’u përfituar si ajo e vitit të kaluar. atsh